سئییدلر
ایچینده‌کیلر
سئییدلر Seyidlər (سیدلر)
اردبیل - مرکزی بخش - سرداوا دهیستانی - دهیستانین مرکزی: خوشکه‌ری
توپونیمیک خصوصیتلر
| سیستئم | تیپ | نؤع | ایضاحات | اهالینین دیلی |
|---|---|---|---|---|
| ماکروسیستئم | اویکونیم | کند | ساده، ائللیپتیک، جوغرافی نومئنسیز | آذربایجان دیلی |
دئموقرافیا
- بیتکی اؤرتویو: یئملیک اوتلاردان علاوه گؤوزابان، ککلیک‌اوتو، بنؤوشه، شووه‌رن، یارپیز، گوه‌ن.
- چؤل حیوانلاری: جاناوار، چاققال، تولکو، دووشان، ککلیک، قیرقوول.
اویکونیمین ائتیمولوگیاسی
- اهرده اوچ، زنگاندا بیر کندین آدی «سئیدلر»دیر. میانادا «سئیدلر-اوچ‌تپه»، «سئیدلر- دلیقانلی»، اورمیادا «سئیدلی»، اهر و زنجان شه‌هرلرینده «سیدلر» کندلری واردیر.
- غربی آذربایجانین تورک منشالی توپونیملری:
-ایروان قوبئرنیاسی‌نین ایروان قضاسیندا، ایندیکی «زنگی‌باسار» (ماسیس) رایونوندا بیر کندین آدی «سیدکند»دیر. رایون مرکزیندن 81 کیلومئتر جنوب- غربده یئرله‌شیر. زنگی‌باسار رایونو تشکیل ائدیلنه‌دک قمرلی (آرتاشات) رایونونون ترکیبینده اولموشدور. کندین بیر آدی «قاراپاپاق کندی» اولموشدور. قافقازین 5 وئرست‌لیک خریطه‌سینده قید ائدیلمیشدیر.
کندده 1831-جی ایلده 130 نفر، 1873-جو ایلده 345 نفر، 1886-جی ایلده 346 نفر، 1897-جی ایلده 483 نفر، 1904-جو ایلده 410 نفر، 1914-جو ایلده 705 نفر یالنیز آذربایجانلی یاشامیشدیر. 1918-جی ایلده کندین ساکینلری ائرمنی تجاوزونه معروض قالاراق قوولموشدور. یالنیز ایندیکی ائرمنیستاندا شورا حؤکومتی قورولاندان سونرا ساغ قالانلار آتا یوردونا دؤنه بیلمیشدیلر. بورادا 1922-جی ایلده 99 نفر، 1926-جی ایلده 131 نفر، 1931-جی ایلده 118 نفر آذربایجانلی یاشامیشدیر. شوروی حؤکومتی‌نین خصوصی قراری ایله 1948-1949-جو ایللرده کندین اهالیسی زورلا آذربایجانا کؤچورولموشدور. 1952-جی ایلده گئری قاییدیب رایونداکی کالینین‌ین آدینا قصبه‌ده یاشامیشلار. 1988-جی ایلده ائرمنیستان دؤولتی طرفیندن قوولموشدور. ایندی ائرمنیلر یاشاییر.
توپونیم «سید» ائتنونیمی ایله «کند» جوغرافی نومئنی‌نین بیرلشمه‌سیندن عمله گلیب «سید تایفاسی‌نین یاشادیغی کند» دئمکدیر. ائتنواویکونیمدیر. مرکب قورولوشلو توپونیمدیر.
-ایروان قوبئرنیاسی‌نین یئنی بایزید قضاسیندا، ایندیکی «باسارکئچر» (واردئنیس) رایونوندا بیر کندین آدی «سیدلر» اولموشدور. باسارکئچر رایونونداکی «نریمانلی» کندینین یاخینلیغیندا یئرله‌شیردی. «ز. قورقودیان»ین اثرینده «سیدنئر/ seyidner» (ائرمنی دیلینده ائر/ er جمع‌لیک بیلدیریر) فورماسیندا قید ائدیلمیشدیر. کندده 1926-جی ایلده 36 نفر آذربایجانلی یاشامیشدیر. 1930-جو ایللرده کند لغو ائدیلمیشدیر. ایندی خارابا کنددیر. ائتنواویکونیمدیر. قورولوشجا ساده توپونیمدیر.
-گنجه قوبئرنیاسی‌نین زنگه‌زور قضاسیندا، ایندی مئغری رایونو اراضی‌سینده بیر کندین آدی «سیدلر کندی»دیر. رایون مرکزیندن 9 کیلومئتر شیمال- غربده یئرله‌شیر. 19-جو عصرین اوللرینده کندین آدی «واردانازور» کیمی رسمی‌لشدیریلمیشدیر.
کندده 1831-جی ایلده 36 نفر، 1873-جو ایلده 316 نفر، 1886-جی ایلده 480 نفر، 1897-جی ایلده 506 نفر، 1904-جو ایلده 439 نفر، 1914-جو ایلده 1053 نفر یالنیز آذربایجانلی یاشامیشدیر. 1918-جی ایلده کند ائرمنی تجاوزونه معروض قالمیش، قیرغینلارلا ساکینلری قوولموشدور. ایندیکی ائرمنیستاندا شورا حؤکومتی قورولاندان سونرا کندی ترک ائدن آذربایجانلیلاردان ساغ قالانلار آتا- بابا یوردلارینا قاییدا بیلمیشدیر. بورادا 1922-جی ایلده 177 نفر، 1926-جی ایلده 180 نفر، 1931-جی ایلده 243 نفر آذربایجانلی یاشامیشدیر. 1988-جی ایلین نوامبر آییندا ائرمنیستان دؤولتی کندین ساکینلرینی- آذربایجانلیلاری تاریخی ائتنیک تورپاقلاریندان قووموشدور. ایندی بورادا ائرمنیلر یاشاییر.
- آذربایجان توپونیملرینین ائنسیکلوپئدیک لوغتی:
1-سئیدلر دره‌سی، اورونیم. جلیل آباد رایونوندا اولان بو دره «سئیدلر» کند آدی و دره جوغرافی تئرمینی‌نین بیرلشمه‌سیندن یارانمیشدیر.
2-سئیدلر کندی، اویکونیم. جلیل آباد رایونوندا اولان بو کندین آدی «سئیدلر» تایفا آدیندان آلینمیشدیر.
توپونیم سیدلر تایفا آدی اساسیندا عمله گلمیشدیر. ائتنواویکونیمدیر. قورولوشجا مرکب توپونیمدیر.
