اوروشنه
اوروشنه Ürüşnə (روشنق)
اردبیل - مرکزی بخش - بالیقلی دهیستانی - دهیستانین مرکزی: شام‌اسبی
توپونیمیک خصوصیتلر
| سیستئم | تیپ | نؤع | ایضاحات | اهالینین دیلی |
|---|---|---|---|---|
| ماکروسیستئم | اویکونیم | کند | ساده، ائللیپتیک، جوغرافی نومئنسیز | آذربایجان دیلی |
دئموقرافیا
- تصرفات: اكينچيليك، مالدارليق، فهله‌لیک و نقلیات.
- محصوللار: بوغدا، يونجا، آرپا، پاخلالی بیتکیلر.
- بيتكي اؤرتويو: ککلیک‌اوتو، یارپیز، بویماده‌رن، توکلوجه. *چؤل حيوانلاري: جاناوار، تولكو، دووشان.
- داغلار: ساری گونئی، قارا قوزئی، آغ گونئی، دو داشی، تزه‌اوجاق، آغ‌داغ
- اراکدا »اوروشت»، بیرجندده «اوروشه»، قومدا «اوروشقان» آدلی کندلر واردیر.
- اردبیلین 16 کیلومئتر جنوب غربینده یئرله‌شیر. رزم‌آرایا20 اساسا 1330-جو ایله کیمی بورادا 360 نفر یاشاییرمیش.
- «شناسنامه روستایی استان اردبیل»: دیگر آدی: ارشنه (اوروشنه)
- اردبیل لیواسی‌نین اردبیل ناحیه‌سینده «روشنق» فورماسیندا قیده آلینمیشدیر و «خالی عن الرعایا» ایفاده‌سی ایله کندین بوشالدیغینی قید اتدیکدن سونرا «حاصل خمس غلات و عشر حبوبات و رسومات سایره» آدی آلتیندا 2500 آغچا وئرگی تعیین ائدیلدیگی بیلدیریلمیشدیر.
اویکونیمین ائتیمولوگیاسی
واختی ایله بو آدی قیدیاتا آلانلار تورک آذربایجان سؤزلرینین باشیندا «ر» فونئمی اولمادیغینا و بونا گؤره ده اولی «ر» حرفی ایله باشلانان آلینما سؤزلرده «ای»، «ا» و «او» فونئملرینین آرتیریلدیغینی نظره آلاراق بو سؤزون فارس دیلیندن آلیندیغینی و اولینه «او» آرتیریلدیغینی تصور ائدیب اونو «روشنق» یازمیشلار. حال بو کی بو، آلینما دئییلدیر و «اوروشنه»دیر. مقایسه اوچون نمین کندلریندن «نو+اش+نق/نه»، ینه ده نمین کندلریندن «پیله‌چای» بؤلگه‌سینده یئرله‌شن «هو+اوش+نق/نه» و همین اویکونیمین آدی «اور+اوش+نق/نه» سؤزلرینی مثال گتیرمک اولار. اوروشنه سؤزونون ائتیمولوگیاسینا گلدیکده ایسه بیرینجی حصه‌سی «اور» داغ، یوکسکلیک، هوندور یئر معناسیندادیر. کندین رئلیئفی ده بونو تصدیقله‌ییر. قید ائدک کی، بعضی آداملارین کوره‌یینده‌کی قابارما دا «اور» آدلانیر و «اورابه‌کی» کندینین آدینین بیرینجی حصه‌سی ده همین معنانی وئریر. قالدی کی، «اوش»/«اش» حصه‌سی دیلیمیزده‌کی «س-ش» کئچیدینی نظره آلساق اوندا «آس» تایفاسینا یئتیشیریک. سؤزون سون حصه‌سی اولان «نه» اصلینده «نی (تایفا)+ا/آ (کیچیلدیجی توپوفورمانت»دیر. دئمه‌لی «اوروشنه» کیچیک آس و نی تایفالارینین هوندورلوکده یئرله‌شن یاشاییش یئری دئمکدیر. مکمل آدی «اوروشنه کندی»دیر.
