چوللار
چوللار Çullar تایفاسی حاققیندا مختلیف فکرلر سؤیلنمیش، اونلارین گاه قافقاز دیللی، گاه دا ایران دیللی اولدوغو قید ائدیلمیشدیر. چول‌لارین بیر قیسمی آلبانیانین شیمال- شرقینده یئرلشمیش، قالانی اورتا آسیادا - خزرین شرقینده مسکونلاشمیشدی. آذربایجان توپونیم‌لری چول‌لارین تورک تایفالاریندان اولدوغونو گؤستریر. ایلک دفعه II عصر مؤلفی دیونی‌سی پئریئگئت طرفیندن خاطیرلانان چوللار آلبانیایا و عموماً شیمالی قافقازا هونلارین ترکیبینده گلمیشلر. چوللار خریستیان‌لیغی ایلک قبول ائدن‌لردن ایدی. کالانکاتلی مویسئی گؤستریر کی، دربند یاخینلیغینداکی چول شهرینده I-II عصرلرده میسسیونئر یئلیسئی خریستیانلیغین تعلیمی ایله مشغول ایدی. چول شهری بو دؤورده واردیسا، دئمه‌لی، چوللار بو یئرلره داها اول‌لر گلمیشلر. ائرکن اورتا عصرلرده خزرلرده چول خصوصی آد کیمی ایشلنمیشدیر. چول سؤزونه - لو شکیلچی‌سی‌نین آرتیریلماسی ایله آذربایجاندا بو تایفانین آدینی یاشا‌دان بیر نئچه کند آدی قالمیشدیر. بونلاردان بیری ده جبراییل اراضی‌سینده چول‌لو کندی ایدی. شرور- درلیز قضاسیندا چول، زنگزور قضاسیندا چول‌لو کندلری اولموشدور. چول ائتنونیمی باشقا تورک خالقلاریندا دا ایز قویموشدور.
