اوج تایفاسی
اوج تایفاسی UC – تاریخی منبع‌لرده اوجار آدلی تایفانین دا آدی چکیلیر. اورتا عصرلرده ]]آنادولو[[دا اوچان (اوچار) آدلی ماحال اولموشدور. بو ماحال چوخ گومان کی، ایران آذربایجانی‌نین اوجان (اوجار) UCAN (UCAR) شهری‌نین (XIII عصردن معلومدور) آدی ایله باغلیدیر. اوجان (اوچان) ائتنونیمی «اوجلارین یاشادیغی یئر»، «اوجلارا مخصوص کند» معناسیندادیر.
بعضی تدقیقاتچیلار اوجار توپونیمینی آذربایجان دیلینده‌کی اوچار (اوچماق فعلیندن) سؤزو ایله علاقه‌لندیریرلر. بیر سیرا آراشدیریجیلار ایسه توپونیمی تورک دیللرینده‌کی اوچ uç («سرحد، سون، آخیر»، «اوجا»، «پاک»، «یوکسک»، «قدرتلی»، «ایشیقلی»، «یئر»، «قوشون دسته‌سی» و س.) سؤزو ایله باغلاییرلار. آر (ار) سؤزو «ارکیشی، ایگید، قدرتلی، دؤیوشچو، پهلوان» آنلامیندادیر. بئله اولان حالدا توپونیم «اوجا، پاک، قدرتلی، ار کیمی» آنلامینا اویغون گلیر. اوج سؤزونون بیر چوخ تورک دیللی خالقلاردا همچنین «بازار»، «آلیش – وئریش یئری» آنلاملاری دا وار.
«کارتلیس تسخوورئردا» Kartlis Tsxovrerda آدلی گورجو سالنامه‌سینده تورک، خزر، پئچئنئق، قیپچاق، بونتورک Buntürk، تورکمن و باشقا تایفالارلا یاناشی او (اوجی) تایفاسینین دا آدی چکیلیر. اونلارین (اوجارلارین، اوجلارین) ساکیت، تمکینلی، عینی زاماندا دؤیوشکن اولمالاری گؤسته‌ریلیر... یاقوت حموی (XII – XIII عصرلر) و حمدالله قزوینی (XIII – XIV عصرلر) چوخ جیلدلیک جغرافی آدلی لغت‌لرینده آذربایجان اراضی‌سینده‌کی قید ائتدیکلری یوزلرله توپونیم‌لر ایچه‌ریسینده اوچان (اوجار) آدینی دا چکمیشلر.
گؤرکملی عثمانلی تاریخچیسی «ابراهیم افندی په‌چه‌وی»نین (1649 – 1574) «تاریخ» اثرینده ده آذربایجاندا آدلاری چکیلن اوروقرافیک اوبیئکت‌لر سیراسیندا اوجان یئری آدلی اراضی‌نین ده آدی دا قید اولونور. بدر شیروانی ( XV عصر) ده اثرینده آذربایجان اراضی‌لری سیراسیندا اوجان (اوجار) آدینی چکمیشدیر.
