بارانلی تایفاسی
بارانلی تایفاسی Baranlı قاراقویون‌لو تایفا اتفاقی‌نین آپاریجی قولودور. بارانلی اویماغی‌نین آد آچیمی هله تام معینلشمه‌ییب. بارانی قوچ کیمی یوزانلار وار. بعضی تدقیقاتچی‌لارین فیکرینجه آدین کؤکو گئدیب اسکی اوغوز به‌ی‌لری سویونا چیخیر. فضل الله رشیدالدینین «جامع التواریخ» آدلی اثرینده بو باره‌ده بیلگی وار. همین بیلگیده دئییلیر: «بوران خانین اؤلوموندن سونرا اوغلو علی خان پادشاه اولدو. . . علی خان اوغلو قیلیج آرسلانا قیرخ مینه یاخین آتلی چیخارا بیلن او یئرلری اداره ائتمه‌یی تاپشیردی».
آغالیق دؤنه‌می بللی اولمایان «قایی» سوی‌لو باران به‌ی اوغوز ائلینی اداره ائتمیشدی. باران به‌یدن سونرا اوغلو علی خان باشچی اولموشدو. علی خانین قیلیج آرسلان آدلی اوغلو وار ایدی.
ماراقلی‌دیر کی،XI عصرده یاشامیش شاه ملیک ابولفوارث بارانی عنوان‌لی، قیلیج آرسلان آدلی اوغوز یابقوسونون آتاسی‌نین آدی دا علی خان ایدی. هر ایکی یابقو جند ایالتینی اداره ائدیب. دئمه‌لی، تاریخله افسانه آراسیندا قیریلماز بیر ایلیشکی وار.
بارانلی اویماغی‌نین نماینده‌لری قاراقویون‌لولار دؤولتینی قورموشدولار. بو دؤولت سقوطا اوغرایاندان سونرا اویماق نماینده‌لری‌نین بعضی‌لری آذربایجاندا قالمیش، بعضی‌لری بابورا قوشولوب هیندیستانا گئتمیشدی.
