خیه‌رک
خیه‌رک Xiyərək (خیارک)
اردبیل - مرکزی بخش - سرداوا دهیستانی - دهیستانین مرکزی: خوشکه‌ری
توپونیمیک خصوصیتلر
| سیستئم | تیپ | نؤع | ایضاحات | اهالینین دیلی |
|---|---|---|---|---|
| ماکروسیستئم | اویکونیم | کند | ساده، ائللیپتیک، جوغرافی نومئنسیز | آذربایجان دیلی |
دئموقرافیا
- تصرفات: اکینچیلیک، مالدارلیق، فهله‌لیک و نقلیات
- محصوللار: بوغدا، یونجا، آرپا، پاخلالی بیتکیلر
- بیتکی اؤرتویو: یارپیز، بابانک، بویماده‌رن، ککلیک‌اوتو
- چؤل حیوانلاری: جاناوار، تولکو، دووشان، آیی، دونوز
- داغلار: جاناوارچایی داغی، قاسیم قابودی، چال داغ، چیه‌لک داغی
- دره‌لر: ساری‌دره، آغ‌دره، ولی دره‌سی، صفر دره‌سی، خاشالیق دره‌سی، حاجی دره‌سی، گئن‌دره، یولچو دره‌سی
- آرخلار: گؤل-گؤل آرخی، بؤیوک‌یورد آرخی، هوسن‌یورد آرخی، سلیمان‌یورد آرخی
- گؤللر: قوزئی گؤل، حسین‌به‌ی گؤلو، قاراگؤل، آت گؤلو، گوللو‌گونئی گؤلو، بوزلو قایا، فرض‌اله یورد گؤلو
- کؤوشنلر: مهدی یئری، قارابولاق، امیرعالی یوردو، کوردیوردو66، آغ زمی، گوده تاختا، یوغون مرز67، پری یئری، اوچ شریک، اقیل داش، باش وه‌ره‌ته *تپه: کول تپه، شریکلر تپه‌سی، به‌ی تپه‌سی (آرخ)، شاهموراد تپه‌سی (آرخ)، یاغوب تپه‌سی (آرخ)، لئغنده‌تپه‌سی؟(آرخ)
- چایلار: نئشتری *چایلاقلار: قاراچای، بولانقی چای
- بولاقلار: باش بولاق (بند آلتی)، آیران بولاغی، آقجا بولاغی، قارابولاق، جیننی بولاق، ساری بولاق، داش بولاق
- آبیده‌لر: آغ مچید، ایستیل داش، ابیللی گؤزه‌سی، بند آلتی، جئدی قایا؟، هاچا شوش قایا، بوزلو قایا، چوروک قایا
- قونشو کندلر: شوشه‌میران، چیل‌گز، سومه‌رین
- زنگاندا ایکی کندین آدی «خئیین»دیر. بوندان علاوه غربی آذربایجان ایلتی‌نین شه‌هرلریندن بیرینین آدی «خوی/ خی»دیر. اصفاهاندا، کیرمانشاهدا، خوررم‌آباددا بیر کندین آدی «خیاران»دیر. قزوینده «خیارج»، بوشه‌هرده «خیارو»، سنندجده «خیاره»، بوشه‌هرده و زابولدا «خیاری» آدلی کندلر واردیر.
- اردبیلین 19 کیلومئتر شیمال غربینده یئرله‌شیر. رزم‌آرایا68 اساسا 1330-جو ایله کیمی بورادا 968 نفر یاشاییرمیش.
- شناسنامه روستایی اردبیل:
«اهالی این روستا در زمان های گذشته به دلیل بی آبی و مشکلات معیشتی از روستای باللوجه (میرک) که در آنطرف کوه ساوالان و در مشکین شهر واقع است مهاجرت کرده و روستای خیارک را بنا نهاده اند». شناسنامه روستایی اردبیلی حاضرلایانلارین بو قناعتی بیزجه تام دوغرودور. حتی چاناقبولاقلیلارین دا باللیجادان گلمه‌لری احتمالی واردیر.
- اردبیل لیواسی‌نین مفصل دفترینده «خیارج» کیمی قیده آلینیب «سومه‌رین»ین قونشوسو و بوش کند اولدوغو، بیلدیریلمکله عینی حالدا یئکون وئرگیسینین 2000 آغچا اولدوغونو دا وورغولانمیشدیر.
اویکونیمین ائتیمولوگیاسی
قدیم منبعلرده «خیارج» فورماسیندا دا یازیلمیشدیر (نزهه‌القلوب اثرینه اساسا قزوینده «خیارج» کندی اولوب). ائتنواویکونیمدیر و ایگید خی تایفاسینا عاید یئر دئمکدیر. خی تایفاسی حاققیندا بیر آز اطرافلی دانیشاق. بو تایفا ایندی ده اورتا آسیادا یاشایان هون تایفالاریندان بیرینین آدیدیر. آذربایجاندا و ائله‌جه ده تورک دیللی اراضی‌لرده گئنیش یاییلان و همین تایفالارین ائتنو گئنئزینده چوخ مهم و تاثیرائدیجی رول اوینایان تورک دیللی تایفالاردان بیری ده «سی» تایفاسیدیر. چین منبعلرینده «خی» تلفظ اولونان «سی» تایفاسی مختلیف تورک دیل و دیالئکت‌لرینده «سی»، «شی» کیمی تلفظ اولونور. دئمه‌لی «سی»، «شی»، «خی» عینی تایفا آدینین مختلیف تلفظ واریانتلاریدیر. همین تایفا تکامل پروسئسینده گنیشله‌نه‌رک اوریژینال آدینی ساخلاماقلا عینی حالدا «ار / آر / ایر» توپوفورمانتینی قبول ائتمکله یئنی آدلارلا تانیناراق مستقل تایفا کیمی اؤزونو بروزه وئرمیشدیر (سی + ار (سیر / سر / سار)، شی + ار (شیر / شر / شار). مثال اوچون اردبیلده «سیاری (سی + ار + ای)» کندی، یئنه اردبیلده «شیران (شی + ار + ان) کندی، یئنه اردبیلده «خیارا / خیه‌رک (خی + ار + ا)»کندی، «ساروو / سراب (سی + ار + اوو)» شه‌هری و س. بو حاقدا یئری گلدیکده داها اطرافلی دانیشاجاغیق.
