بایاتلار
بایاتلار بویات/ بایات Bayat سلجوق – اوغوز تایفالاریندان بیریدیر. عمومیتله بویات تورکدیللی قبیله‌لردن بیری‌نین آدیدیر. بو قبیله‌نین IX-X عصرلرده قای تایفاسی ایله یاناشی، شیمالی قافقازین چؤللرینده اوغوزلارا باشچیلیق ائدن تایفالاردان اولماسی گؤستریلمیشدیر. بایاتلارین کیچیک آسیادا تشکلو و سلجوق تورک‌لرینه گلیشلری دؤورو ایله باغلیدیر...
بویات (بایات) تایفاسی XI – XII عصرلرده سلجوق اوغوزلاری‌نین یوروشلرینده اشتراک ائتمیشلر. XV عصرده صفوی‌لرین بیر حصه‌سی حاکمیت اوغروندا مبارزه‌یه باشلایاندا بایاتلار قیزیلباش تایفا اتفاقی‌نین ترکیبینه داخیل اولموشدور. مشهور اوزان، ائل آغ‌ساققالی دده‌قورقود، گؤرکملی آذربایجان شاعری محمد فضولی بویات (بایات) تایفاسیندان چیخمیشلار. چوخ گومان کی، آذربایجان پوئزیاسیندا ان کیچیک میصراعلی «بایاتی» شعیر نؤعوونون آدی دا همین تایفا ایله علاقه‌داردیر...
تورک تایفالاریندان بیری اولان بایاتلار اول‌لر تورکوستان صحراسیندا یاشامیش و بورادان مونقول هجوملاری زامانی اونلارلا بیرلیکده کیچیک آسیایا و دیگر اراضی‌لره یاییلمیشلار. کیچیک آسیادا سلجوقلارلا قایناییب قاریشمیش بایاتلارین بیر حصه‌سی تیمور آنادولونو توتدوقدان سونرا دیاربکیره کؤچورولموش و اورادان باغداد (ایندیکی عیراق) اراضی‌لرینه کؤچموشلر. سونرالار صفوی شاهلاری (XVIII عصرده) بایاتلارین بیر حصه‌سینی قیزیلباشلار آدی ایله مازاندارانا، تئهرانا و خوراسانا کؤچورموشلر. آمما آنادولودا دا بایاتلارین بیر حصه‌سی قالمیش و مختلیف واخت‌لاردا اونلار بورادان آذربایجان اراضی‌لرینه کؤچموشلر. آذربایجانا بایاتلار صفوی‌لر طرفیندن آذربایجانین تمثالیندا بیر سیرا تایفالاری، آزسایلی خالقلاری رام ائتمک و یئرلی حؤکمدارلاری قوتلندیرمک مقصدی ایله ده گؤندرمیشدیر...
XVII عصرده یاشامیش گؤرکملی اورتا عصر تاریخچیسی ابوالقاضی‌نین وئردیگی معلوماتا گؤره، اوغوز – تورک تایفالاریندان اولان بایاتلارین (بویاتلارین) وطنی آرال دنیزی ایله ایسیککول İsıkkul گؤلو آراسینداکی اراضی‌لر اولموشدور. تورکوستاندا یاشایان تورکدیللی بایات قبیله‌سی مونقول اوردوسونا قوشولوب کیچیک آسیایا گلمیش، سلجوق تورک‌لرینه قاریشمیشلار. تاریخدن معلومدور کی، IX – X عصرلرده اوغوزلارین تایفا اتفاقینا باشچیلیق ائدن تایفالاردان بیری ده بویاتلار ایدی. بویاتلار (بایاتلار) آذربایجانا IX عصرین ایکینجی یاریسیندا اوغوز تایفالاری ایله بیرلیکده گلمیشلر. اونلار عینی زاماندا آنادولودا، ایراندا، عیراقدا دا یاییلمیشلار.
تیموری‌لر دؤورونده آنادولودان کؤچورولن اوغوزلارلا گئری قاییدارکن بایاتلارین بیر قیسمی آذربایجاندا قالمیشلار. زامان کئچدیکجه اونلار یئرلی اهالی ایله قایناییب قاریشمیشلار. صفوی شاهلاری XVI عصرده آذربایجانا بایاتلارین دا بیر حصه‌سینی کؤچورموشدور...
سلجوق اوغوزلاری‌نین بایات (بویات) تایفاسی‌نین آدینی اؤزونده عکس ائتدیرن توپونیم‌لر چوخدور. بایات (بویات) ائتنونیمی ایله علاقه‌دار تورکیه‌ده، عیراقدا، تورکمنیستاندا، قازاخیستاندا، اؤزبه‌کیستاندا و دیگر اراضی‌لرده ده یاشاییش منطقه‌لری قیده آلینمیشدیر. مونقولوستاندا «اوریاتلار» قروپوندان اولان بیر خالق دا «بایاتلار» آدلانیر...
