بولقارلار

آذربایجان توپونیمیکاسی سایتیندان

بولقارلار Bulqarlar قدیم تورک تایفالاریندان‌ اولان بولقارلارین قارا دنیزین شیمال ساحل‌لرینه هون دؤوروندن قاباق گلدیگی قید اولونور. خورئن‌لی مویسئی اونلارین قافقازا میلاددان قاباق II عصرده گلدیک‌لرینی و کولا‌دان جنوبدا یئرلشدیک‌لرینی، غ. غیبوللایئف بو اراضی‌نین ایندیکی اوردوباد رایونو اراضی‌سینه اویغون گلدیگینی گؤستریر. س. س. علیاروف دا بیر نئچه دالغا ایله گلن پروتوبولقارلارین IV-V عصرلرده کنگرلرله کومپاکت (سیخ) شکیلده آلبانیا اراضی‌سینده مسکونلاشدیقلارینی قید ائتمیشدیر.

«کیتابی- دده قورقود»دا بولقار سؤزونون خصوصی شخص آدی کیمی ایشلنمه‌سی هم بولقارلارین، هم ده «ده‌ده قورقود»ون آذربایجانلا بلاواسیطه باغلی‌لیغی باخیمیندان اهمیت‌لی‌دیر. بیله‌سووار رایونو اراضی‌سیندن کئچن بولقارچای، یئنه بو اراضی‌لرده کئچمیشده قیده آلینمیش بولقار، بولقارکند، بولقار، گؤی‌تپه بولغاوار یاشاییش منطقه آدلاری بولقارلارین قدیم ایزلری‌دیر. خورئن‌لی مویسئیین اثریندن آیدین اولور کی، بولقارلارین بیر قیسمینی تشکیل ائدن باسیل‌لر ده 216- جی ایلده آلبانیادا یئرلشمیشلر. بولقارلارین کور، چاکار، کوریقیر، اوخسون، قول، قازان، ایسکیل و س. بؤلوک‌لری اولموشدور. غ. غیبوللایئف بونلارین هامی‌سی‌نین آلبانیا توپونیم‌لرینده ایز قویدوغونو معین ائتمیشدیر: جبراییل و ایمیش‌لی اراضی‌لرینده خوبیارلی («کور» سؤزو)، جبراییلدا چاخیرلی، آذربایجاندا 10 مختلیف اراضیده قازانچی، مختلیف اراضی‌لرده قول‌لار، ازگیل‌لی کند آدلاری و س. ده بو تایفانین بؤلوم‌لری‌نین آدلارینی یاشا‌دیر.