سیراک لار
سیراک لار Siraklar آلبانیا اراضی‌سینده‌کی تایفا‌لاردان بیری ده سیراک‌لار ایدی. سیراک تایفا آدی شیراک و چیراک شکیل‌لرینده ده ایشلنمیشدیر. سیراک‌لارین جنوب- شرقی آوروپا چؤل‌لرینده یاشایان تورک دیللی سارمات- آلان تایفالاریندان آیریلیب گلدیگینی، هم ده میلادان قاباق گلدیک‌لرینی قید ائتمیشلر. سیراک‌لار ائرمنیستان و آلبانیا اراضی‌لرینده مسکونلاشمیشدیلار.
تاریخچی‌لر سیراک‌لارین شخص آدلاری و توپونیم‌لری اساسیندا تورک دیللی اولدوقلارینی اثبات ائتمیشلر. آنتیک مؤلف‌لردن تاتسیت سیراک‌لارین زورسین، ایسترابون ایسه آبئاک آدلی چاری اولدوغونو قید ائتمیشدیر. هر ایکی آد تورکجه ایضاح اولونور. لاتین دیلینده «چ» سسی اولمادیغی اوچون چورسین آدی زورسین کیمی یازیلمیشدیر. چور تورکجه «پهلوان»، «قهرمان»، «گوجلو» معناسیندا‌دیر؛ سین (شین، چین) «کیشی»، «آدام» دئمکدیر. تورک خاقانی چور- تاردوش آدی کیمی. آبئاک آدی تورک دیل‌لرینده آباقا «عمی» سؤزوندندیر. سؤزون تورک منشالی اولدوغونو گؤسترمک اوچون تئلئنگیت‌لرین باشچی‌سی (VIII عصر) آباک، تئلئوت‌لارین خانی(XVII عصر) آباک، چینگیز خانین نسلینده آباقا، چوواشلاردا ایشلنن آباک، آبایاک آدلارینا دقت یئتیرمک اولار. شیمالی قافقازدا شهر آدی اوسپو «اوچ اوپو (اوچ اوبا)» کیمی برپا اولونور. قاراقالپاقلاردا کارا- سیراک، اؤزبک‌لرده جووان- سیراک، کاتتا- سیراک، تورکمن‌لرده چیراخچی تایفا آدلاری دا واردیر. مویسئی خورئناسی شیمال‌دان تورک بولقارلارین میلاددان قاباق II عصرده گلیب ائرمنیستانین شیراک ماحالیندا مسکونلاشدیغینی یازمیشدیر. خورئناسی شیراک‌لارا مخصوص قوشار خصوصی آدینی قید ائدیر کی، بو دا خالص تورکجه‌دیر: قوش - «آلیجی قوش» و ار سؤزلریندندیر. شیراک‌لار ائرمنیستاندا آرپاچای ساحل‌لرینده مسکونلاشمیش و بو اراضی‌لر شیراک- ائل آدلانمیشدیر (تاریخی ادبیاتدا شوراقئل، شوریل شکیل‌لرینده). ائرمنیستاندا XIX عصره قدر شیراکقالا آدلی شهرین خارابالیقلاری قالیرمیش. ایندی ائرمنیستان‌داکی شیراک رایونو همین تایفانین آدینی داشی‌ییر و غ. غیبوللایئفین قیدینه گؤره، ائرمنی‌لر شیراک‌لاری ایران منشالی سایدیقلاریندان بو آدی دییشمیرلر. ایروان قوبئرنیاسیندا شیراک کندی ده اولموشدور. «کیتابی-دده قورقود»دا ایسه کاتیب سهوی کیمی، بو سؤز شیرکو کیمی ایشلنمیشدیر. بیر سیرا رایونلاردا اولان «سیریک» توپونیمی ده بو تایفانین آدینی داشی‌ییر. جبراییلدا سیریک کندی کیمی.
