چاناقبولاق
ایچینده‌کیلر
چاناقبولاق Çanaqbulaq (چناقرد)
اردبیل - مرکزی بخش - سرداوا دهیستانی - دهیستانین مرکزی: خوشکه‌ری
توپونیمیک خصوصیتلر
| سیستئم | تیپ | نؤع | ایضاحات | اهالینین دیلی |
|---|---|---|---|---|
| ماکروسیستئم | اویکونیم | کند | ساده (قورولوشجا مرکب: بیرینجی نؤع تعیینی سؤز بیرلشمه‌سی)، ائللیپتیک، جوغرافی نومئنسیز | آذربایجان دیلی |
دئموقرافیا
- تصرفات: اکینچیلیک، مالدارلیق، فهله‌لیک و نقلیات.
- محصوللار: بوغدا، یونجا، آرپا، پاخلالی بیتکیلر.
- بیتکی اؤرتویو: بویماده‌رن، بابانک، یارپیز، ککلیک‌اوتو
- چؤل حیوانلاری: جاناوار، تولکو، دووشان، ککلیک، چؤل‌اؤرده‌یی ، دونوز، قاز
- داغلار: ساوالان
- دره‌لر: اؤلوبولاغی، جین‌لی بولاق، یوخاری بولاق، آشاغی بولاق، اورتا بولاق، هورو بولاغی، سه‌رنی بولاغی، جئجان بولاغی، جیغا بولاغی، ایلانلی بولاق، گؤزه بولاغی (بابانظر بولاغی)، آغ‌بولاق، قه‌جه‌ل بولاغی، داداش بولاغی، سالمان بولاغی، که‌ره‌مه‌ت بولاغی، ارزوللا بولاغی، خالیق بولاغی، کوربولاق، اورتا بولاق، ایمانخان بولاغی، ایلدیریم ووران بولاق، چالا چاخناق، چاناق بولاق، مهدی خان بولاغی
- گؤللر: اوجو (Ocu Gölü) گؤلو، دیبسیز گؤل، گؤزه گؤلو، آت گؤلو، اؤردک گؤلو
- تپه‌لر: گول‌قاسیم، نه‌دیر تپه‌سی، آراز قوزئیی، گؤی‌تپه، گوران تپه‌سی، آغالار تپه‌سی، قالاباشی(آرخئولوژی)، دوه – دوه، لغنده قالاسی
- دره‌لر: هوسه‌ن دره‌سی، دره‌ایچی، که‌وشن (کؤوشن) دره‌سی، ساری دره، قیزیل‌قایا، ائینیشدره‌سی، قوزئی‌دره، خییه‌رک دره‌سی، سومه‌رین دره‌سی، قونسول دره‌سی
- یوللار: داش‌یولو، دره‌ایچی‌نین یولو، قیراق اوستو، تول (tül) یولو، اورتا یول، ائل‌یولو، قیراق‌باشی، سومه‌رین یولو، قه‌جه‌ل یولو، کورکندی (kürkəndi) یولو، دیوجین (دیجویجین) یولو، ده‌ییرمان یولو، تزه یول، خییه‌رک یولو، شه‌هر یولو، سرداوا یولو
- خاصیتلی داشلار: دوه داشی، اؤسکوره‌ک داشی، دوزوم (Düzüm) داش، زیبله داشی، ده‌لیکلی داش، ایمامعالی کله‌یی
- چایلار، آرخلار، گؤللر: نئشته‌ری چایی، که‌وشن آرخی، شور گؤل، دوروگؤل، زئیی گؤلو، ماندآرخی، ده‌ییرمان آرخی.
- یئر آدلاری: قوشون‌دوشن، آغیل، آرخ آلتی، سوتؤکولن(شیخ‌احمد)، ابیلقاسیم یئری، اوروف یئری، داوشانلیق، آواشا، ائیواز یئری، خارابا، دیلیک – دیلیک، قویو – قویو، او تای، هاچا، باری یئری، تاختا، قه‌جه‌ل، دؤرد اوتاق، ایمامزاداشان، اه‌یری بوجاق، کوللیک، خامی یئری، دام‌دالی، آغالار خارمانی، قالابؤیرو، سه‌کی – سه‌کی، قوزای(قوزئی)، ائوقاباغی، سرنی، سرنی‌دره‌قیراغی، بند، آت مئیدانی، چینقیل، لیغه‌نده، بابانظر، یاستان، باشماق چیخان، ایره‌ددیل، توراخئیشن (توراخایی ائشن)، مه‌شی یئری، صمد یارغانی، پئشته، تپه دیبی، بوزدوق (Bozduq)(بوزلوق)، چینارلی یئر، داشلی یئر، آلی یئری، حه‌تم یئری، آغ‌یئر، دیزآغاردان، پلنگ‌اؤلن، داشلی گونه‌ی، لیغه‌نده قالاسی، خوشگه‌ری بورنو، دابان پوشگو، فاتیش یئری، پناه‌آلی یئری، راهاب سؤیودلویو، پیر قاباغی، وه‌ریان، آماللا یئری، به‌یلر یئری، ایمامعالی گونه‌یی، خوشگه‌ری باشی، دیوجین اوستو، جومادی‌تاختاسی، خارابالیق، حسنعالی گونه‌یی، عسگر پوشگو، مه‌هی کالاهی، حسنخان کوللوگو، نازارلی کوللوگو، آغ‌تورپاقلیق، بارس سددی، سومه‌رین سددی، به‌چچه سددی، قامبو (Qambo) یئری، آشاغی گونه‌ی، جوجوق، یاستان، ایلانجیق، نوروش یئری، قوربان یئری، عوض یئری، چایداغ، قوچو داغی، قوبادخان هاماری، تندیری، چال آغاج،
- باغلار: عالی‌عسگر چایی، یوخاری چای، آشاغی چای، آغالار باغی، نوروللا باغی، داداش چایی.
- چمن‌لر: عاباس چمنی، بؤیوک چمن، نؤیوتلو چمن، فه‌تعالی چمنی.
- قونشو کندلر: خوشکه‌ری، خیه‌رک و جومادی
اویکونیمین ائتیمولوگیاسی
- مئشکینده، میانادا، ماراغادا «چاناقبولاق» آدلی کندلر واردیر. بوندان علاوه تبریزده بیر کندین، ساوادا ایسه ایکی کندین (آشاغی-یوخاری) آدی «چاناقچی»، اورمیادا بیر کندین آدی «چاناقلی»، همداندا بیرکندین آدی «چاناخ»دیر. بوندان باشقا اهرده هوندورلویو 2195 مئتر اولان «چنخ/ چاناخ» داغی، اوجاندا هوندورلویو 2772 مئتر اولان «چاناق» آدلی داغ واردیر.
- اردبیلین 12 کیلومئتر شیمال غربینده یئرله‌شیر. رزم‌آرایا61 اساسا 1330-جو ایله کیمی بورادا 1150 نفر یاشاییرمیش.
- شناسنامه روستایی:
«حدود پانصد سال قبل فردی بنام کد خدا آللاه‌قولو ترابی فرد را در مشگین شهر به قتل رسانده و بدین خاطر به اینجا مهاجرت کرده است و این روستا را بنا کرده است. چون این روستا دارای دو چشمه در یک دره دارد و در زبان ترکی چناق به محل گود می گویند بنابر این چناق بلاغ به تدریج جناقرد نامیده شده است». البته بوراداجا قید ائدک کی، بو کندین «خیو» ایله (چوخ احتیمال کی، باللیجا ایله) علاقه‌سی دانیلماز فاکتدیر. «بنابراین چناق بلاغ به تدریج جناقرد نامیده شده است» عباره‌سینه گلدیکده ایسه بو کند هئچواخت چناقرد آدلانمامیشدیر. مؤلف ایسه بونو رسمی قیدیاتلارداکی اویدورمالارا اساسلاناراق یازمیشدیر.
چاناخ‌بولاق:
- قه‌به‌له رایونونون انضباطی اراضی‌سینده کند. باش قافقاز سیلسیله‌سینین اته‌یینده‌دیر.
- یاردیملی رایونونون آستانلی انضباطی اراضی‌سینده کند. بورووار سیلسیله‌سینین اته‌یینده‌دیر. چاناقبولاق واریانتیندا دا قیده آلینمیشدیر. یئرلی اهالینین معلوماتینا گؤره یاشاییش منطقه‌سینی جنوبی (ایران) آذربایجانداکی «چاناقبولاق» کندیندن گلمیش اوچ قارداش بینه ائتمیشدیر. سونرالار اطراف اراضیلردن ده اهالی بورایا کؤچوب مسکونلاشمیشدیر. چاناقبولاق هیدرونیمدیر. چاناق (تاختا قاب، چؤکک، چوخور) و بولاق (سو حؤوزه‌سی) حصه‌لریندن دوزلمیش بو هیدرونیم «چوخور یئرده قاینایان بولاق» معناسیندادیر. کندلرین اراضی‌سینده عینی آدلی بولاقلار اولدوغوندان کندلر ده چاناقبولاق آدلاندیریلمیشدیر.
- لئریک رایونوندا جوغرافی آد. چاناق ایچی اویولماقلا آغاجدان (تاختادان) حاضرلانمیش 3-4 کیلوقرام اون، یاخود بوغدا توتان قابدیر.
خوجالی رایونونون عینی آدلی انضباطی اراضی بؤلگوسونده بیر کندین آدی «چاناقچی»دیر. چاناقچی چایی‌نین ساحلینده، داغ اته‌یی اراضیده‌دیر. کند حاققیندا بئله بیر معلومات وئریلیر کی، یاشاییش منطقه‌سینی 19-جو عصرین اورتالاریندا کئچمیش «قاراداغ» کندیندن کؤچموش دؤرد عائله سالمیشدیر. همین عائله‌لر اوللر آغاجدان چاناق قابلار دوزلدیب ساتماقلا مشغول اولدوقلاری اوچون اونلار چاناقچی آدلانمیشلار. ائتنوتوپونیمدیر. کئچن عصره عاید ادبیاتدان معلوم اولور کی، داش‌کسن رایونونونون «زینزاهال» انضباطی اراضی‌سینده «چاناخچی» آدلی کند اولموشدور. ائرمنیستانین «آرارات» رایونونداکی «سوئتاشئن» کندینین آدی دا 1948-جی ایله قدر چاناخچی اولموشدور.
چاناقچی ائرمنیستان و آذربایجاندا (شرور رایونوندا) چای. منبعینی 2520 مئتر هوندورلوکدن آلیر. یاغیش و قار سولاریندان قیدالانیر. تئز-تئز سئل حادثه‌لری باش وئردیگیندن جهنم‌دره ده آدلانیر. خوجالی رایونو اراضی‌سینده ده عینی آدلی چای وار. اهرده چناق و مشگین شهر و میانا شه‌هرلرینده «چناقبولاق» کندلری واردیر. بوندان علاوه ماراغادا «چاناقبولاق» تبریزده «چاناقچی» ساوادا یوخاری و آشاغی چناقچی، اورمیادا «چاناقلی» کندلری بو هیدرواویکونیمین گئنیش یاییلدیغینی گؤسته‌ریر. نمین کندلریندن بیری «قاراچاناق» آدلانیر و سون درجه ایچمه‌لی سویو ایله مشهوردور. دئمه‌لی چاناقبولاق هیدرواویکونیمدیر. ماراقلیدیر کی، تیمسار رزم‌آرانین حاضیرلادیغی «فرهنگ جوغرافیایی ایران» اثرینده (4-جو جیلد، 1330) دیگر رسمی دایره‌لرین خیلافینا اولاراق بو اویکونیمین آدی اوریژینالدا اولدوغو کیمی (چناق بلاغ) یازیلمیشدیر.
- اردبیل لیواسینین مفصل دفترینده «چاناغیرد» فورماسیندا قیده آلینمیش، بوش اولدوغو و 1500 آغچا وئرگی تعیین ائدیلدیگی بیلدیریلمیشدیر.
ماناس ائنسیکلوپئدیاسینین ایکینجی جیلدینده «چاناک»آدلی توپونیم قید ائدیلمیشدیر. اویکونیم اورادا اولان، یاخود اولموش چاناق فورمالی بولاغین آدی ایله آدلانمیشدیر.
دئمه‌لی هیدرو اویکونیمدیر. مکمل آدی «چاناقبولاق کندی»دیر.
