داشلیجا
داشلیجا Daşlıca (داشلوجه)
اردبیل - مرکزی بخش - شرقی ارشه دهیستانی - دهیستانین مرکزی: تاغدیزه
توپونیمیک خصوصیتلر
| سیستئم | تیپ | نؤع | ایضاحات | اهالینین دیلی |
|---|---|---|---|---|
| ماکروسیستئم | اویکونیم | کند | ساده، ائللیپتیک، جوغرافی نومئنسیز | آذربایجان دیلی |
دئموقرافیا
- تصرفات: اکینچیلیک، مالدارلیق.
- محصوللار: بوغدا، آرپا، یونجا، پاخلالی بیتکیلر.
- بیتکی اؤرتویو: یئملیک اوتلاردان علاوه ککلیک‌اوتو، کئشنیش، سیری قویروغو، یارپیز.
- چؤل حیوانلاری: جاناوار، تولکو، دووشان، ککلیک.
- داغلار: قهرمان داغی
- آبیده: 200 ایل تاریخی اولان داشجا مسجیدی
- چایلار: نجی چای، پیله چای
- قونشو کندلر: تاغدیزه و بایرام بدنی
- اهر و زنگان شه‌هرینده «داشلیجا» کندی وار، سویوق‌بولاقدا «داشکندی»، گونبذده «داشلی» آدلی کندلر واردیر. اؤزبه‌کیستان جمهوریتی‌نین پایتاختی «تاشکند»دیر.
- داشلیجا کندی اردبیل- موغان یولوندان آزجا آرالیدا و اردبیلین 21 کیلومئتر شیمالیندا یئرله‌شیر. رزم‌آرایا129 اساسا 1330-جو ایله کیمی بورادا 142 نفر یاشاییرمیش.
- «شناسنامه روستایی استان اردبیل»ین یازدیغینا گؤره کندین قدیم آدی «صاریم آباد» اولوب، 300 ایل تاریخی واردیر. قید ائدک کی بو اثرده وئریلن تاریخین هئچ بیرینین رقم اعتباری یوخدور. یئنه همین اثرده یازیلیر: داشلوجه یعنی داش یاتاقی، فردی بنام صارم السلطنه آباد کرده است».
- قه‌به‌له رایونونون زاراغان انضباطی اراضی واحدینده، قارا قوبو چایی ساحلینده و داغ اته‌یی اراضیده یئرله‌شن بیر کندین آدی داشلیجادیر. چوخ واخت داشجا واریانتیندا ایشله‌نیر. کندین اراضی‌سی خیردا داش و چینقیلدان عبارت اولدوغو اوچون بئله آدلاندیریلمیشدیر.
داشلی + جا (رتبه، درجه بیلدیرن توپوفورمانت). کندین جوغرافی لاندشافتینی عکس ائتدیریر. دئمه‌لی اورواویکونیم اولماقلا عینی حالدا جوغرافی نومئنسیزدیر. مکمل فورماسی ایسه «داشلیجا کندی»دیر.
- غربی آذربایجاندا، ایندیکی ائرمنیستاندا «داش» سؤزو اساسیندا یارانان 13 کند آدی واردیر: «داش‌آلتی»(2کند)، «داش‌باش»، «داش‌بولاق»، «داش‌قالا»، «داش‌کئیتی»، « داش‌کند»(2 کند)، «داش‌خیرمان»، «داشلی»، «داش‌نوو»(2 کند)، «داش‌یاتاق».
بونلاردان «داشلیجا» ایله عینی معنادا اولان «داشلی» کندینین ایضاحینی وئریریک: بو کند ایروان قوبئرنیاسی‌نین ایروان قضاسیندا، ایندی وئدی (آرارات) رایونوندا، رایون مرکزیندن 3 کیلومئتر مسافه‌ده، وئدی چایی‌نین یانیندا یئرله‌شیر. «ایروان ایالتی‌نین اجمال دفتری»نده و قافقازین 5 وئرست‌لیک خریطه‌سینده قید ائدیلمیشدیر.
کندده 1831-جی ایلده 84 نفر، 1873-جو ایلده 147 نفر، 1886-جی اسلده 135 نفر، 1897-جی ایلده 184 نفر، 1904-جو ایلده 238 نفر، 1914-جو ایلده 261 نفر، 1916-جی ایلده 171 نفر آذربایجانلی یاشامیشدیر. 1918-جی ایلده ائرمنی‌لر طرفیندن قوولموش و خارجدن، ایران و تورکیه‌دن ائرمنی‌لر کؤچوروله‌رک بورادا یئرله‌شدیریلمه‌یه باشلامیشدیر. ایندیکی ائرمنیستاندا سووئت حاکمیتی قورولاندان سونرا کنددن قوولموش ساغ قالان آذربایجانلیلار اؤز دوغما اوجاقلارینا دؤنه بیلمیشلر. کندده ائرمنی‌لرله یاناشی 1922-جی ایلده 93 نفر، 1926-جی ایلده 95 نفر، 1931-جی ایلده 117 نفر آذربایجانلی یاشامیشدیر. 1947-48-جی ایللرده «طبق تصمیم ویژه شورای وزیران اتحاد جماهیر شوروی» آذربایجانلیلار اؤز آتا- بابا یوردوندان قووولاراق آذربایجانا کؤچورولموشدور. ایندی بورادا یالنیز ائرمنی‌لر یاشاییر. توپونیم آذربایجان دیلینده ایشله‌نن «داش» سؤزونه چوخلوق معناسی ایفاده ائدن «-لی» شکیلچیسی‌نین قوشولماسی اساسیندا یارانیب. اورواویکونیمدیر. قورولوشجا دوزلتمه توپونیمدیر. کندین آدی ائرمنیستان سووئت دؤولتی‌نین 1968-جی ایل، 3.VII نؤمره‌لی فرمانی ایله دگیشدیریله‌رک «داشتاکار» (داشت/ دشت= چؤل، کار= داش) قویولموشدور.
آنکارادا، آنتالیادا، آرتوین‌ده، ترابزوندا، تووقاتدا، سیواسدا، نیقده‌ده، «موش»دا، موغلادا، ماردینده، گوموشخانادا، گیرئسوندا، قازیانتبده، ارزورومدا بیر کندین، اورفا و قارصدا ایسه ایکی کندین آدی داشلیجادیر.
«عثمانلی یئرآدلاری»نین قیدیاتینا اساسا بوسنیادا، کوسوودا، صیربیستاندا و یوقوسلاویانین قاراداغ ماحالیندا «طاشلیجا» آدلی یئر آدلاری اولموشدور.
